I. Kafli. Heiti félagsins og hlutverk 

1. gr. 

Félagið heitir Verslunarmannafélag Suðurlands og er stéttarfélag verslunar- og skrifstofufólks. Félagssvæði þess er Árnessýsla,Rangárvallasýsla og Vestur Skaftafellssýsla.  

Félagið er aðili að Landssambandi verslunarmanna sem er aðili að Alþýðusambandi Íslands. Heimili félagsins og varnarþing er á Selfossi. 

2. gr. 

Tilgangur félagsins er: 

a)   Að sameina allt verslunar- og skrifstofufólk sem starfar á félagssvæðinu. 

b)   Að vinna að sameiginlegum hagsmunamálum félagsmanna, svo sem með því að semja um kaup og kjör, bættan aðbúnað við vinnu og gæta þess að ekki sé gengið á rétt félagsmanna. 

c)   Að vinna að fræðslu- og menningarmálum. 

3. gr. 

Inngöngu í félagið geta þeir fengið sem: 

a)   Vinna, hafa unnið eða eru að hefja störf er 2. gr. a - liður greinir frá. 

b)   Eru fullra 16 ára að aldri. 

c)   Standa ekki í óbættum sökum við félagið eða önnur stéttarfélög innan ASÍ, sem viðkomandi hafa verið í. 

d)     Eru ekki fullgildir félagsmenn í öðru félagi innan ASÍ. 

4. gr. 

Sá sem óskar inngöngu í félagið skal senda skriflega inntökubeiðni til stjórnar félagsins eða þess sem hún vísar til. Inntökubeiðnin skal borin upp á fundi stjórnar og samþykki meirihluti mættra stjórnarmanna inntökubeiðnina er umsækjandi orðinn löglegur félagi. Felli stjórnarfundur inntökubeiðni skal félagsfundur úrskurða um inngöngubeiðni. Synji félagsfundur um inngöngu í félagið getur aðili skotið málinu til miðstjórnar ASÍ en úrskurður félagsfundar gildir þar til miðstjórn hefur úrskurðað annað. 

5. gr. 

Heimilt er að taka í félagið sem aukafélaga unglinga innan 16 ára aldurs, þá sem greiða til félagsins en hafa ekki óskað eftir inngöngu sbr. 4. gr. og aðra sem stunda vinnu samkvæmt þeim samningum sem félagið hefur gert og starfa á starfssvæði félagsins um stundarsakir en eru félagar í öðru félagi. 

Aukafélagar greiða fullt félagsgjald meðan þeir eru á félagssvæðinu, hafa málfrelsi og tillögurétt á fundum félagsins, en hvorki atkvæðisrétt né kjörgengi. Skyldur félagsins gagnvart aukafélögum eru hinar sömu og gagnvart aðalfélögum. 

6. gr. 

Úrsögn úr félaginu getur því aðeins átt sér stað að félagsmaður sé skuldlaus við félagið. Úrsögn skal vera skrifleg. Hún skal afhent formanni félagsins eða skrifstofu ásamt félagsskírteini úrsegjanda. 

Félagsmenn halda félagsréttindum meðan þeir gegna trúnaðarstörfum í verkalýðshreyfingunni. 

Enginn getur sagt sig úr félaginu eftir að atkvæðagreiðsla um vinnustöðvun hefur verið auglýst eða ákvörðun um vinnustöðvun hefur verið tekin af félaginu og þar til vinnustöðvuninni hefur verið formlega aflýst. Einnig er óheimilt að segja sig úr félaginu til þess að taka upp störf félagsmanna í öðru félagi er lagt hafa niður vinnu vegna deilu. 

II. Kafli. Réttindi og skyldur félagsmanna, réttindamissir, brottrekstur 

7. gr. 

Réttindi félagsmanna eru eftirfarandi: 

a)   Málfrelsi, tillögu- og atkvæðisréttur á félagsfundum svo og kjörgengi. Atkvæðisréttur um kjarasamninga eftir nánari ákvörðun félagsfundar. 

b)   Réttur á styrkjum úr sjóðum félagsins, að uppfylltum þeim skilyrðum sem sett eru í reglugerðum sjóðanna. 

c)   Réttur til að vinna eftir þeim kjörum sem samningar félagsins ákveða hverju sinni. 

d)   Réttur til aðstoðar félagsins vegna vanefnda atvinnurekenda á samningum. 

8. gr. 

Skyldur félagsmanna eru: 

a)   Að hlýta lögum félagsins, fundarsköpum, fundarsamþykktum og samningum í öllum greinum. 

b)   Að greiða félagsgjöldin á réttum gjalddaga. 

c)   Að vinna ekki með ófélagsbundnum mönnum í greininni eftir því sem félags- eða trúnaðarráðsfundur tekur ákvarðanir um. 

d)   Að stuðla að því að ófélagsbundnir menn gangi í verkalýðsfélagið og tilkynna til félagsins brot á lögum og samþykktum félagsins. 

9. gr. 

Félagsgjöld skulu innheimt sem 1% af launum en þó er heimilt að ákveða lágmarksgjald á aðalfundi. 

Félagsmaður sem skuldar lögboðin gjöld til félagsins fyrir 6 mánuði eða meira nýtur ekki fullra félagsréttinda, svo sem atkvæðisréttar, kjörgengis né styrkja úr sjóðum félagsins. Félagsréttindi öðlast hann ekki á ný fyrr en skuldin er að fullu greidd. 

Tveggja ára skuld varðar útstrikun af félagsskrá. Stjórn félagsins getur veitt þeim sem sjúkir eru og fallið hafa af launaskrá eða stunda nám eftirgjöf á félagsgjaldi. 

10. gr. 

Ef félagsmaður er sakaður um brot á lögum félagsins skal málið tekið fyrir á stjórnarfundi sem ákveður með einföldum meirihluta atkvæða hvort veita skuli áminningu eða víkja félagsmanni úr félaginu. Skjóta má þeim úrskurði til félagsfundar. 

Hver sá maður er rækur úr félaginu í lengri eða skemmri tíma sem að áliti félagsfundar hefur unnið gegn hagsmunum félagsins, bakað því tjón eða gert því eitthvað til vansa, svo og hver sem ekki hlýðir lögum þess eftir gefna áminningu í félaginu. 

Úrskurði félagsfundar um áminningu eða brottvísun félagsmanns má vísa til Alþýðusambandsins, en úrskurður félagsfundar gildir þar til sambandið ákveður annað. 

Hafi félagsmanni verið vikið úr félaginu á hann ekki afturkvæmt í félagið nema inntökubeiðni hans sé samþykkt á lögmætum félagsfundi. 

III. Kafli. Stjórn og trúnaðarráð 

11. gr. 

Stjórn félagsins skipa 7 menn. Formaður, varaformaður, ritari, og 4 meðstjórnendur. Þá skulu kosnir 2 menn til vara, fyrsti og annar varamaður. 

Kjörtímabil stjórnar og trúnaðarráðs sbr. 15 gr. er  tvö ár. 

12. gr. 

Stjórnin hefur á hendi yfirstjórn allra félagsmála milli félagsfunda. Stjórnin boðar til félagsfunda, sbr. 19. grein. Hún ræður starfsmenn félagsins, ákveður laun þeirra og vinnuskilyrði.  

Stjórnin ber sameiginlega ábyrgð á eigum félagsins.  

Skylt er stjórn félagsins að stuðla að því að allt er varðar sögu félagsins sé sem best varðveitt.  

Láti félagsmaður af trúnaðarstörfum sem hann gegnir fyrir félagið er honum skylt að skila af sér öllum gögnum sem trúnaðarstarf hans varðar. 

13. gr. 

Formaður félagsins kveður til stjórnarfunda og stjórnar þeim.  

Formanni er skylt að halda stjórnarfund óski a.m.k. 2 stjórnarmenn eftir því. Formaður undirritar gerðarbækur félagsins og gætir þess að allir stjórnarmenn geri skyldu sína.  

Hann hefur eftirlit með starfsemi félagsins og eftirlit með því að lögum þess og samþykktum sé fylgt í öllum greinum.  

Varastjórnarmenn taka sæti í stjórn í forföllum aðalmanna. Varaformaður gegnir skyldum formanns í forföllum hans. 

14. gr. 

Ritari ber ábyrgð á því að gerðarbækur félagsins séu haldnar og færðar í þær allar fundargerðir og lagabreytingar. 

Hann undirritar gerðarbækur félagsins ásamt formanni.  

Heimilt er að hljóðrita fundi félagsins. Formaður hefur í hendi eftirlit með fjárreiðum félagsins og bókfærslu eftir nánari ákvörðun stjórnarinnar sem ber sameiginlega ábyrgð á fjárreiðum félagsins. 

15. gr. 

Trúnaðarráð skal vera starfandi í félaginu. Í ráðinu eiga sæti stjórn félagsins og varastjórn og 8 fullgildir félagsmenn sem kosnir eru í ráðið til eins árs.  

Þá skulu kosnir 3 varamenn í trúnaðarráðið um leið og aðalmenn eru kosnir. Formaður félagsins skal vera formaður trúnaðarráðs og ritari félagsins ritari þess. 

Formaður kveður trúnaðarráð til funda með þeim hætti er hann telur heppilegan.  

Skylt er formanni að boða trúnaðarráð til fundar ef þriðjungur þess óskar og tilgreinir fundarefni.  

Trúnaðarráðsfundur er löglegur ef meirihluti ráðsmanna mætir, eða alls 7 aðalmenn eða varamenn þeirra. 

Formaður getur í nafni félagsstjórnar kallað saman trúnaðarráð stjórninni til aðstoðar þegar félagsleg vandamál ber að höndum og ekki eru tök á að ná saman félagsfundi, og ræður einfaldur meirihluti úrslitum í slíkum málum. 

16. gr. 

Samninganefnd skal vera starfandi í félaginu. Hlutverk hennar er að annast um kjarasamningsgerð fyrir hönd félagsins. Nefndin skal kjörin af trúnaðarráði og í henni skulu eiga sæti 9 menn. Formaður félagsins skal vera formaður samninganefndar. Samninganefnd er heimilt að skipta með sér verkum eftir samningssviðum. 

17. gr. 

Kjörstjórn skal vera starfandi í félaginu. Hlutverk hennar er að annast um stjórn atkvæðagreiðslna um kjarasamninga, verkföll og allsherjaratkvæðagreiðslur skv. lögum félagsins. Kjörstjórnin skal kjörin af aðalfundi og í henni skulu eiga sæti tveir menn og tveir til vara. Við stjórnun atkvæðagreiðslna um kjarasamninga og verkföll skipar trúnaðarráð þriðja stjórnarmanninn og skal hann vera formaður kjörstjórnar. Við stjórnun allsherjaratkvæðagreiðslna um önnur atriði skv. lögum félagsins og/eða lögum ASÍ skipar miðstjórn ASÍ þriðja kjörstjórnarmanninn og skal hann vera formaður kjörstjórnar. 

IV. Kafli. Fundir og stjórnarkjör 

18. gr. 

Félagsfundir skulu haldnir þegar félagsstjórn álítur þess þörf eða minnst 20 fullgildir félagsmenn óska þess við stjórn félagsins og tilgreina fundarefni.  

Fundir skulu boðaðir með minnst tveggja sólarhringa fyrirvara með auglýsingu sem tryggt er að nái til allra félagsmanna.  

Þó má í sambandi við vinnudeilur boða fund með skemmri fyrirvara. Fundur er lögmætur ef löglega er til hans boðað.  

Fundum félagsins skal stjórnað eftir almennum fundarsköpum.  

Komi upp ágreiningsatriði um fundarsköp úrskurðar fundarstjóri hverju sinni með rökstuddum úrskurði.  

Óski einstakur félagsmaður eftir skriflegri atkvæðagreiðslu á félagsfundi er fundarstjóra skylt að verða við þeirri ósk. 

19. gr. 

Aðalfundur félagsins skal haldinn fyrir lok aprílmánaðar ár hvert.  

Aðalfundur skal boðaður með dagskrá með 7 sólarhringa fyrirvara og er hann lögmætur ef löglega er til hans boðað. Um boðun aðalfundar fer að öðru leyti með sama hætti og boðun félagsfundar. 

Á aðalfundi skulu tekin fyrir þessi mál: 

n            Skýrsla stjórnar fyrir liðið starfsár. 

n            Endurskoðaðir reikningar félagsins lagðir fram til afgreiðslu. 

n            Kosning stjórnar, varastjórnar og trúnaðarráðs. 

n            Kosning tveggja félagslegra skoðunarmanna og eins til vara. 

n            Kosning til annarra stjórna og ráða sem lög og reglugerðir félagsins gera ráð fyrir. 

n            Lagabreytingar, ef fyrir liggja.

n            Ákvörðun félagsgjalda.

n            Önnur mál.

20. gr

Á félagsfundi sem haldinn skal í síðasta lagi þremur mánuðum áður en kemur að aðalfundi þar sem fram fer kjör stjórnar og trúnaðarráðs skal kosin þriggja manna uppstillingarnefnd sem hefur það hlutverk að stilla upp lista til stjórnar og trúnaðarráðs. 

Uppstillinganefnd skal hafa lokið störfum í siðasta lagi tveimur mánuðum fyrir aðalfund og skal tillaga hennar auglýst fyrir félagsmönnum í síðasta lagi einum og hálfum mánuði fyrir aðalfund. 

Í auglýsingunni skal þeim sem hug hafa á að bjóða fram annan lista til stjórnar og trúnaðarráðs gefinn að minnsta kosti tveggja vikna frestur til að koma fram slíku framboði. 

V. Kafli. Fjármál

21. gr. 

Aðalfundur skal ákveða upphæð og greiðslumáta félagsgjalda.

Reglulegt þing ASÍ ákveður þó lágmarksfélagsgjald verkalýðsfélaga hverju sinni, sbr. 41. gr. laga ASÍ.

22. gr. 

Af tekjum félags skal greiða öll útgjöld þess og annan kostnað, er stafar af samþykktum félagsfunda eða stjórnar.  

Við meiri háttar ráðstafanir á eigum félagsins þarf samþykki félagsfundar. 

23 gr. 

Tveir félagslegir skoðunarmenn skulu yfirfara reikninga félagsins fyrir liðið reikningsár og gera athugasemdir sínar við þá.  

Skoðunarmenn eru kosnir á aðalfundi.  

Hlutverk þeirra er m.a. að hafa eftirlit með því að fjármunum félagsins sé varið til þeirra verkefna sem félagsfundur og/eða stjórn hafa ákveðið.  

Auk athugunar hinna félagskjörnu skoðunarmanna er stjórn félagsins skylt að láta löggiltan endurskoðanda endurskoða reikninga og fjárreiður félagsins í lok hvers reikningsárs.  

Reikningar félagsins skulu liggja frammi, til skoðunar fyrir félagsmenn, 14 dögum fyrir aðalfund. 

24. gr. 

Sjóðir í eigu eða vörslu félagsins skulu vera: 

Félagssjóður, sjúkrasjóður, orlofsheimilasjóður og aðrir sjóðir sem stofnaðir kunna að vera. Allir sjóðir félagsins aðrir en félagssjóður skulu hafa sérstaka reglugerð sem samþykkja þarf á aðalfundi.  

Reglugerðum sjóða má aðeins breyta á aðalfundi. Reglugerð hvers sjóðs skal tilgreina hlutverk sjóðsins, hverjar tekjur hans skuli vera, hvernig verja skuli fé hans og hvernig honum skuli stjórnað. 

Sjóðir félagsins skulu ávaxtaðir á tryggan hátt í ríkisskuldabréfum, í ríkistryggðum skuldabréfum í bönkum eða í sparisjóðum, í skuldabréfum tryggðum með veði í fasteign eða á annan hátt er stjórn félagsins og trúnaðarráð metur tryggan. 

Tekjur félagsins skiptast milli sjóðanna samkvæmt ákvæðum í reglugerðum þeirra. 

VI. Kafli. Lagabreytingar 

25. gr. 

Lögum þessum má breyta á aðalfundi félagsins enda hafi breytinganna verið getið í fundarboði. Einnig er heimilt að breyta lögum á félagsfundi, hafi lagabreytingarnar áður verið ræddar á félagsfundi og breytinganna getið í fundarboði. 

Til þess að breytingin nái fram að ganga verður hún að vera samþykkt með 2/3 hlutum greiddra atkvæða fullgildra félagsmanna. 

Breytingar á lögunum koma fyrst til framkvæmda er miðstjórn ASÍ hefur staðfest þær. 

VII. Kafli. Félagsslit 

26. gr. 

Félaginu verður ekki slitið nema 3/4 allra félagsmanna samþykki það að viðhafðri allsherjaratkvæðagreiðslu.  

Verði samþykkt að leggja félagið niður skal Alþýðusamband Íslands varðveita eignir þess þar til annað félag er stofnað með sama tilgangi á félagssvæðinu.  

Fær það félag þá umráð eignanna að áskildu samþykki miðstjórnar Alþýðusambandsins. 

Um sameiningu félaga skal fjallað á sama hátt og lagabreytingar. 

Lög félagsins þannig samþykkt á Stofnfundi félagsins mánudaginn .15 maí 2000. 

Ákvæði til bráðabrigða. 

Á aðalfundi 2002 skal kjósa alla stjórnina til eins árs.