Á fundinn mættu 5 af þingmönnum Suðurkjördæmis þau:

Oddný G. Harðardóttir frá Samfylkingu

Róbert Marshall frá Samfylkingu

Anna Margrét Guðjónsdóttir frá Samfylkingu

Sigurður Ingi Jóhannsson frá Framsóknarflokki

Margrét Tryggvadóttir frá Hreyfingunni

Aðrir þinmenn boðuðu forföll.

Farið var yfir nokkur stór og brýn verkefni á Suðurlandi en þykir heimamönnum sem lítið hafi þokast og fá verkefni framundan.

Stór verkefni á vegum ríkisins sem eru á lokastigi voru nefnd og spurt var hvort áætlanir stæðust. Það eru m.a.

Lyngdalsheiði, Landeyjahyöfn, Suðurstrandavegur og Hvítárbrú. Svöruðu þingmenn því til að öll þessi verkefni væru á áætlun og að ljúka.

Spurt var um fleiri stór verkefni í vegagerð sem breytt gætu miklu í atvinnuástandi á svæðinu eins og Suðurlandsveg með nýja brú yfir Ölfusá, Varnargarða við Vík og tvöföldun á 22 einbreiðum brúm austan Selfoss. Fram kom í svörum þingmanna að fyrsti hluti Suðurlandsvegar sem átti að byrja á í maí er í kæruferli svo framkvæmdir frestast af þeim sökum, Varnargarðar við Vík bíða skipulagsvinnu og breikka á eina einbreiða brú á þessu ári og tvær á næstu fjórum árum samkvæmt vegaáætlun.

Rætt var um önnur mannaflsfrek verkefni s.s. gagnaver á Reykjanesi, Búðarhálsvirkjun, virkjanir í Þjórsá, Kísilhreinsunarverksmiðju í Þorlákshöfn, stækkun fangelsisins á Litla-Hrauni, stækkun hafnarinnar í Þorlákshöfn og viðhald opinberra bygginga. Búið er að skrifa undir samning um gagnaverið og Búðarhálsvirkjun er í kæruferli og frestast því eitthvað. Nokkur umræða varð um kísilhreinsunarverksmiðjuna en samkv. upplýsingum frá Iðnaðaráðuneyti verður hún staðsett í Grindavík en ekki í Þorlákshöfn. Eftir fundinn fengust þær upplýsingar að um tvær verksmiður væri að ræða aðra í Grindavík og hina í Þorlákshöfn. Ekki gátu þingmenn staðfest aðrar framkvæmdir sem um var spurt, en stækkun fangelsis er nú í nefnd.

Rætt var um stöðuna á úboðsmarkaði og undirboð og nýsköpun í atvinnu. Fram kom hjá þingmönnum að á Suðurlandi væri áberandi að menntunarstig atvinnulausra væri lægra en annars staðar á landinu og bent á að mun minna væri sótt í styrki vegna rannsókna og nýsköpunar á svæðinu. Taldi þingmaður að sóknartækifæri sunnlendinga felist í meiri menntun og ferðaþjónustu.

Rætt var um nýlegan dóm hæstaréttar vegna gengistryggðra lána og skuldavanda heimilanna. Bentu þingmenn á að skuldavandi væri ekki nýtt fyrirbæri og benti m.a. á að skuldir árið 2004 hafi verið meiri en 2008. Skuldavandi íslendinga væri langvarandi og hluti af kúltúr okkar íslendinga. Allir þingmenn voru sammála um að taka þurfi á vandanum og bentu á nýsamþykkt lög um umboðsmann skuldara og bætta réttarstöðu skuldara gagnvart lánadrottnum. Nokkur umræða varð um gjaldmiðil okkar íslendinga og benti þingmaður á að frá 1970 vefur verðbólga verið 82.000% á íslensku krónunni.

Rætt var um hlutverk alþingis og aðkomu hagsmunasamtaka að ákvörðunum stjórnvalda.

Kjarasamningar á vinnumarkaði renna flestir út næsta vetur, formenn stéttarfélaganna búast við átökum á vinnumarkaði og kom fram hjá þingmönnum von um að ekki verði ófriður á vinnumarkaði, og töldu það muni hafa slæm áhrif á stöðu efnahagsmála. Stéttarfélögin bentu á að ríkið hafi ekki staðið við þá samninga sem gerðir hafa verið og því vnadséð hvernig komast megi hjá átökum á vinnumarkaði. Lágmarkslaun eru alltof lá og millitekjuhópurinn hefur ekki bolmagn til að taka á sig aukna skattbyði.

Stéttarfélögin stefna að nýjum fundi með þingmönnum í haust í aðdraganda kjarasamninga.